لو طفلك مش قادر يحفظ جدول الضرب، فده مش معناه إنه ضعيف في الرياضيات، ومش معناه إنه مش بيركز، ومش معناه إن عنده مشكلة في الحفظ أصلاً.

والدليل على ده، إنك لو جربتي تلاحظي يومه العادي، هتلاقي إن طفلك ممكن يقعد بالساعات يلعب لعبة على الموبايل ويحفظ كل تفاصيلها ويعرف كل مرحلة فيها وكل حركة بتعمل إيه.

وممكن يسمع أغنية مرة أو مرتين وتلاقيه بيرددها لوحده بعد كده، وممكن يبقى فاكر اسم لعبة اشتريتيهاله من شهور، وفاكر مكانها اتحط فين.

طيب إيه اللي بيحصل بقى لما يجي يحفظ جدول الضرب؟ وليه فجأة بيقولك “مش عارف أحفظ” أو “صعب”؟

الحقيقة إن المشكلة مش في طفلك خالص… المشكلة في الطريقة اللي اتقدمله بيها جدول الضرب.

الأطفال بطبيعتهم مبيتعلموش بالحفظ الجاف… هم بيتعلموا لما يشوفوا الحاجة ويلمسوها ويجربوها ويلعبوا بيها.

ولما الطفل بيشوف رقم مجرد على الورق زي: 4 × 6 = 24 من غير ما يكون فاهم يعني إيه 4 مجموعات، أو يعني إيه 6 عناصر في كل مجموعة، هيحس إن الموضوع صعب وغامض.

وده المخ ببساطة مش بيلاقي سبب يخليه يهتم أو يركز، لأنه مش شايف معنى واضح قدامه، لكن لما نفس الفكرة تتقدم للطفل بطريقة فيها لعب وصور وتجربة وحكاية وتفاعل.

ساعتها المعلومة بتثبت بسهولة جدًا من غير ضغط ولا توتر ولا خناقة على المذاكرة، وفي المقال ده، مش هنتكلم عن جدول الضرب كأرقام لازم تتحفظ وخلاص، لكن هنوضحلك إزاي تبسطي الفكرة لطفلك، وإزاي تحولي جدول الضرب من حاجة تقيلة عليه لحاجة بيتعامل معاها ببساطة، ويمكن كمان يستمتع بيها.